سابق صدر ممنون حسین طویل علالت کے باعث انتقال کرگئے

ڈے نیوز اردو:> سابق صدر  ممنون حسین طویل علالت کی وجہ سے اکیاسی برس کی عمر میں انتقال کرگئے۔

سابق صدر مملکت کے بیٹے ارسلان ممنون کے مطابق ممنون حسین دو ہفتوں سےایک پرائیویٹ اسپتال میں زیر علاج تھے۔ وہ طویل عرصہ سے کینسر کے عارضے میں مبتلا تھے۔

سابق صدر نے سوگواروں میں ایک بیوہ اور تین بیٹے چھوڑے ہیں۔

 ممنون حسین 23 دسمبر 1940 کو آگرہ انڈیا  میں پیدا ہوئے، وہ مسلم لیگ ن کے سینیئر رہنماؤں میں سے  تھے اور 2013 سے 2018 تک 5 سال صدر مملکت کے عہدے پر فائز رہے۔

ان کا خاندان قیام پاکستان کے وقت ہجرت کرکے پاکستان آیا۔ ممنون حسین نےکراچی یونیورسٹی سے گریجویشن اور انسٹیٹیوٹ آف بزنس ایڈمنسٹریشن سے ماسٹرز کی ڈگری لی۔ وہ ایک معروف کاروباری اور سیاسی شخصیت تھے۔

صدر مملکت عارف علوی سمیت متعدد شخصیات نے سابق صدر کے انتقال دکھ اور افسوس کا اظہار کیا ہے 

صدر مملکت عارف علوی نے کہا ہے کہ سابق صدر ممنون حسین کے انتقال پر دکھ اور افسوس ہے، دکھ اور غم کی اس گھڑی میں اہل خانہ کے غم میں ان کے ساتھ ہیں۔

صدر مسلم لیگ ن میاں شہباز شریف نے سابق صدر ممنون حسین کی رحلت پر اظہار افسوس کرتے ہوئے کہا کہ ہم ملک سے محبت کرنے والی شخصیت سے محروم ہوگئے۔

صدر مسلم لیگ شہباز شریف نے کہا کہ سابق صدر ممنون حسین میاں نواز شریف کے بہترین،  بااعتماد، مخلص اور نظریاتی ساتھی تھے، ملک و قوم اور پارٹی کے لئے ان کی خدمات ہمیشہ تاریخ کا حصہ رہیں گی۔

چیرمین سینیٹ صادق سنجرانی نے سابق صدر ممنون حسین کے انتقال پر دکھ اور اظہار افسوس کیا ہے ۔ انھوں نے کہا ہے کہ ممنون حسین کی ملک و قوم کے لئے لازوال خدمات کو ہمیشہ یاد رکھا جائے گا۔

ڈپٹی چئیرمین سینیٹ مرزا آفریدی نے بھی سابق صدر ممنون حسین کے انتقال پر دکھ اور اظہار افسوس کیا ہے۔

سابق صدر آصف علی زرداری نے بھی ممنون حسین کے انتقال پر دکھ اور افسوس کا اظہار کیا ہے۔