مسلم لیگ ن اب مفاہمت پسند نہیں مزاحمت پسند جماعت بن چکی ہے۔ مریم نواز

 پٹرولیم مصنوعات میں اضافہ کرکے عوام پٹرول پر بم گرادیا گیا ہے

مریم نواز آزاد کشمیر الیکشن مہم کے سلسلے میں جلسوں سے خطاب کر رہی ہیں

پلندری/ مظفرآباد (نیوز ایجنسیاں/ٹی وی رپورٹ) پاکستان مسلم لیگ (ن)کی نائب صدرمریم نواز نے آزاد کشمیر میں جلسوں سے خطاب میں کہا ہے کہ ن لیگ اب مفاہمت نہیں مزاحمت پسند جماعت بن گئی،تیل کی قیمتوں میں اضافہ کرنے سے عمران خان کو فرق نہیں پڑتا کیونکہ وہ تو سائیکل پر دفتر جاتے ہیں۔ نوازشریف کو قید کے دوران جیل میں قتل کرنے کی سازش کی گئی تھی۔ ووٹ چوری کرنے کی منصوبہ بندی ہو رہی ہے اگر ووٹ کی چوری کرکے حکومت بنائی گئی تو وہ حکومت  کہیں پہاڑ بھی گروی نہ رکھ دے ،یاد رکھو ووٹ چوروں کو کہیں منہ چھپانے کی جگہ نہیں ملے گی۔گذشتہ دن وہ کشمیر کے علاقے تحصیل بلوچ اور پلندری میں انتخابات کے سلسلے میں جلسوں سے پرجوش خطاب کرتے ہوئے مریم نواز نے کہا کہ عید سے پہلے عوام پرپیٹرول بم گرادیا گیا ہے، جب تیل کی قیمت اضافہ ہوتا ہے توہرچیزکی قیمت میں بڑھ جاتی ہے، تیل کی قیمت میں اضافہ سے عمران خان کوفرق نہیں پڑتا کیونکہ وہ سائیکل دفترجانے کے لیے استعمال کرتے ہیں۔انہوں نے کہا کہ پہلے سلیکٹڈ عمران خان نے مقبوضہ کشمیر کو بھارت کی جھولی میں ڈالا، اب ان کی نظر اس آزاد کشمیر پر ہے، سلیکٹڈ عمران خان پر نواز شریف کا نام سنتے ہی کپکپی طاری ہوجاتی ہے، الیکشن میں واضع ہار نظر آنے پر اب انہیں انتخابی اصلاحات اور وٹنگ مشینیں یاد آ رہی ہیں۔ مریم نوازنے کہا کہ وہ آزاد کشمیرکے بیٹے نواز شریف کا سلام لائی ہیں، بلوچ والوں کا شکریہ جنھوں نے میرا بہترین استقبال کیا، کشمیر زندہ آباد کا نعرہ لگانے سے میرے رونگٹے کھڑے ہوجاتے ہیں کیوں کہ میں بھی کشمیری ہوں اور میری رگوں میں بھی کشمیری خون ہے۔